அன்னக்காவடி தருமம் தாயே! நாள்தோறும், இரவில் அடியவர்களுக்கு அன்னம் பாலிக்கக் கோரக்கச் சித்தர் ஆலயத்தில் சிறப்பான ஒரு நெறி பல நூறு ஆண்டுகளாகப் பின்பற்றப்பட்டு வருகிறது. இவ்வாசிரமத்தின் தலைமப் பூசாரியோ, அன்றி அவரின் உதவியாளர்களில் ஒருவரோ மாலை 7.00 மணி அளவில் தம் தோளில் ஓர் அன்னக்காவடியை ஏந்தி இவ்வூரின் வடக்கு மற்றும் தெற்கு வீதிகளில் உள்ள இல்லங்களுக்கு செல்வார். காவடியின் இருபக்கங்களிலும் பெரிய பானைகள் உரியில் வைக்கப் பெற்றிருக்கும். இரண்டு அன்னக்காவடி தம் இல்லத்தின் வாயிலில் வந்து நின்றவுடன், புதிதாக இரவில் சமைத்த சோற்றினை ஒரு தட்டில் எடுத்து வந்து அவ்வில்லத்துப் பெண்கள் அன்னக்காவடிப் பானையில் இடுகின்றனர். ‘அன்னக்காவடி தருமம் தாயே’ என்று கூறி வரும், இவ்வன்னக்காவடிக்கு அங்கு வாழ்ந்து வரும் அனைவரும் அன்னம் பாலிக்கப்படுகிறது.